Bokåret 2023 var godt, med mykje og variert utlån. Det er sjølvsagt litt ulik lånekultur på dei ulike biblioteka i kommunen, men her er ei oversikt over utlånet i Ullensvang kommune samla, og litt om aktiviteten på biblioteka i året som gjekk.
10 på topp, vaksenlitteratur
- Atlas: historien om Pa Salt, roman ved Lucinda Riley
- Abida Raja: frihetens øyeblikk, biografi ved Håkon F. Høydal
- De tre, roman ved Valerie Perrine
- Oskespiralen, roman ved Leander Djønne
- Å vanne blomster om kvelden, roman ved Valerie Perrine
- Skråpånatta, roman ved Lars Mytting
- Eitranes, roman ved Lars Ove Seljestad
- Gjøkungen, roman ved Camilla Lackberg
- Min skyld: en historie om frigjøring, biografi ved Abid Raja
- Gjentakelsen, roman ved Vigdis Hjorth
10 på topp, barnelitteratur
- Kjærlighetens vind: et godnatt-eventyr ved Camilla Brinck
- Portaltreet. Andre del, ved Malin Falch
- Jakten på Campingkongen ved Jørn Lier Horst
- Trollriket ved Malin Falch
- Operasjon Farsstripe og andre mysterier ved Jørn Lier Horst
- Vikingene og orakelet ved Malin Falch
- Portaltreet. Første del ved Malin Falch
- En hemmelig verden ved Carbone
- Mysteriet med hullet i veggen ved Camilla Brinck
- Bjørnar, et eventyr fra Nordlys ved Malin Falch
Det var mange som venta på den siste romanen til Lucinda Riley, som vart utgitt etter at ho var død. Elles har svært mange lest dei sterke biografiane av Abida Raja og Abid Raja, og interessa har òg vore stor for “våre eigne” forfattarar Leander Djønne med Oskespiralen og Lars Ove Seljestad med Eitranes. Akkurat no opplever me venteliste på Frode Grytten sin prislønna roman Den dagen Nils Vik døde, og me tippar denne vil markera seg sterkt på lista for 2024.
For barn er det teikneserieromanar som også i år er den store hiten, særleg serien Nordlys med Malin Falch. Detektivserien til Jørn Lier Horst er like populær no som då fyrste boka i serien kom for 10 år sidan.
Utån og besøk på dei ulike bibliotekavdelingane i Ullensvang kommune:
På Odda bibliotek har me ein auke i utlån både for barn og vaksne i forhold til 2022. Me er endå ikkje attende på før-corona tal, men pila peikar positiv veg, og det same gjeld besøkstalet, der elektronisk teljing viser at over 50000 personar har vore innanfor dørene våre i 2023. Då har me lagt inn eit solid fråtrekk for førehandstemming og generelle besøk til kommunen.
Jondal bibliotek har som før gode utlånstal ettersom biblioteket er eit kombinasjonsbiblioteket og alle lån til skule, både skjønn og fag vert registrert i folkebibliotekstatistikken. Biblioteket vert mykje nytta, både av skule, barnehage og folk elles. Biblioteket har manuell registrering i opningstida, men ønskjer å etablera elektronisk teljing i nær framtid.
Kinsarvik bibliotek har hatt ei solid auke i besøkstala. Det er born/unge som står for den største auken, heile 50% auke frå året før! Dei kjem etter skuletid og gjer lekser, sit på pc, gamer (PlayStation) og pratar. Det er mykje liv på biblioteket, og me fyller greitt opp Bibliotekloven sin paragraf om at biblioteka skal vera ein kulturell og sosial møtestad. På Utne bibliotek er det òg ei auke i besøkstala for born/unge. Begge biblioteka har skipa til langt fleire arrangement enn under og etter pandemien, og folk er stort sett flinke til å møta på desse.